Verklokaskýrsla

VerklokaskyrslaHér birtist verklokaskýrsla um lagningu ljósleiðara um hinar dreifðu byggðir í Rangárþingi ytra. Skýrslan var kynnt fyrir sveitarstjórn Rangárþings ytra þann 13. desember 2017. Skýrslan inniheldur umfjöllun um forsögu, undirbúning, framkvæmdir og niðurstöðu verkefnisins. Þá er einnig lagt mat á hvort verkefnið hafi uppfyllt áætlanir og væntingar er snúa að kostnaði, gæðum og tíma. Fram kemur í verklokaskýrslunni að tengistaðir urðu alls 413 og kostnaður við verkefnið reyndist vera 348 mkr eða 92% af áætlun. Fyrsta hænufetið í undirbúningi verkefnisins var tekið á gamlársdag 2014 eða fyrir 3 árum síðan. Að mörgu var að hyggja í upphafi, ekki síst hvernig mögulega mætti fjármagna verkefnið en okkar gæfa var fólgin í því að hefja undirbúning snemma þó ekki væru allir hnútar hnýttir. Þegar sást orðið til lands með skipulag og fjármögnun og tekist hafði að fá framúrskarandi verktaka í málið þá tók framkvæmdin sjálf einungis 11 mánuði. Sveitarstjórn ályktaði um það á fundi sínum í vikunni að verkefnið hafi heppnast afar vel og að tekist hafi að bæta búsetuskilyrði í sveitarfélaginu svo um munar. Það er gleðilegt og ekki spillir fyrir að íbúar Rangárþings ytra eiga þessa verðmætu fjárfestingu sjálfir.

Verklokum fagnað

rangarljos-verklok-3

Ágúst Sigurðsson færði lykilaðilum í verkefninu þakklætisvott. F.v. Ágúst Sigurðsson – sveitarstjóri Rangárþings ytra, Sævar Eiríksson – eftirlitsmaður Rangárljósa, Ólafur Einarsson – eigandi Þjótanda ehf, Gunnar Bragi Þorsteinsson – framkvæmdarstjóri TRS, Haraldur Benediktsson – þingmaður sjálfstæðisflokksins og hvatamaður Íslands ljóstengd, Guðmundur Daníelsson verkefnisstjóri Rangárljósa og Páll Jóhann Pálsson f.v. þingmaður Framsóknarflokksins og hvatamaður Ísland ljóstengt.

Það var mikil gleði ríkjandi í Rangárþingi ytra sl. föstudag þann 19 ágúst þegar síðasti bærinn var tengdur í ljósleiðaraverkefni sveitarfélagsins. Framgangur verksins hefur verið með ólíkindum góður en verktakar hófu störf þann 26. september í fyrra og unnið hefur verið hvern nýtan dag og verkinu nú lokið. Verkefnið er það stærsta sinnar tegundar hérlendis fram til þessa enda víðfeðmt sveitarfélag og nánast 100 % þátttaka auk þess sem fjöldi sumarhúsa voru einnig tengd. Sveitarstjórn og starfsfólk sveitarfélagsins Rangárþings ytra fögnuðu verklokum með starfsmönnum verktakans Þjótanda og undirverktakans TRS í Menningarhúsinu á Hellu þar sem stiklað var á stóru yfir helstu áfanga á framkvæmdatímanum, ávörp flutt og glaðst yfir góðu verki.

Síðasti bærinn tengdur

Hvammur_tengdur_3

Það var kátt yfir ýtustjóranum okkar, Haraldi Magnússyni, þegar hann renndi með ljósleiðarann í hlaðið á Hvammi á Landi. Með því er þessu mikla og mikilvæga verkefni lokið en það hófst þann 26. september í fyrra þegar haldið var af stað frá Næfurholti á Rangárvöllum. Verkið hefur gengið frábærlega vel enda valinn maður í hverju rúmi. Halli sá ástæðu til að opna eina „Pepsi Max“ í tilefni dagsins.

Áfangar 10 og 12

Þjónustuveitum hefur verið sendur listi yfir þau hús sem tilheyra áföngum 10 og 12. Þar með eiga þjónustuveitur að hafa upplýsingar um alla tengda staði sem tilheyra ljósleiðarakerfi Rangárljóss.
Ef misbrestur er á því að þjónustuveitur kannist við að hafa upplýsingar um tiltekin hús innan kerfisins þrátt fyrir að óskað hafi verið eftir ljósleiðara, nú eða ef frágangur á ljósleiðara er ekki lokið á tilteknum tengistöðum biðjum við viðkomandi að hafa samband, annað hvort í síma 863 4106 (Guðmundur) eða með tölvupósti á netfangið gudmundur@snerra.com .

Áfangar 10. 11 og 12

Þjónustuveitum hefur verið sendur listi yfir tengistaði í áfanga 11. Það er því ekkert því til fyrirstöðu að þeir sem tilheyra þeim áfanga geti pantað sér fjarskiptaþjónustu. Einnig hefur okkur borist skilaboð frá verktakanum okkar að áfangar 10 og 12 verði klárir á næstu dögum. Við vonum svo sannarlega að þessum tveimur áföngum verði skilað til okkar fyrir helgina og margt sem bendir til þess. Íbúar innan þessa áfanga geta því búið sig undir það að panta sér þjónustu og í framhaldi fá heimsókn frá fulltrúa þeirrar þjónustuveitu sem varð fyrir valinu hjá hverjum og einum.

 

Tengingar í áfanga 9

Eigendur tengistaða í áfanga 9 geta nú pantað sé fjarskiptaþjónustu. Verktakar okkar hafa nú lagfært þá ljósleiðaraþræði sem reyndust undir okkar gæðaviðmiðum og tilheyra áfanga 9. Þjónustuveitur hafa því móttekið staðfestan lista yfir tengistaði sem tilheyra áfanganum.   Til upprifjunar afmarkast áfangi 9 af Borg í austur og Háfi í vestur. Þar með er öllum áföngum vestan Ytri-Rangá lokið að ógleymdum fyrsta áfanga verkefnisins sem náði frá Næfurholti að Geldingalæk. Mælingar úr áfanga 11 berast okkur á allra næstu dögum. Íbúar á því svæði, sem tilheyra áfanga 11, geta því undirbúið sig undir það að panta sér fjarskiptaþjónustu.

 

 

Áfangi 8 tilbúinn

Í gær var þjónustuveitum sendur staðfestur listi yfir tengistaði sem tilheyra áfanga 8. Áfangi átt nær frá Hellu, um Ægissíðu og að Þykkvabæ.  Heimili og aðrir tengistaðir á þessari leið geta því pantað sér fjarskiptaþjónustu.  Búið er að framkvæma mælingar á ljósleiðaraþráðum í áfanga 9.  Nokkrar samsetningar á ljósþráðum reyndust ekki innan þeirra gæðaviðmiða sem við gerum og því þarf að laga þær.  Unnið er nú hörðum höndum að lagfæringum og ef fram fer sem horfir verður áfangi 9 tilbúinn til tenginga síðar í þessari viku.

Ef allt gengur eftir skilar verktakinn okkur mælingum fyrir áfanga 10, 11 og 12 fyrir lok næstu viku. Við uppfærum upplýsingar hér á síðunni jafnharðan.

 

Síðasta tengitunnan teiknuð

Nú upplifum við síðustu handtök verksins. Ólíkar aðgerðir sem þó eiga það sameiginleg að vera nauðsynleg skref að settu marki taka nú enda.  Í dag var til dæmis síðasta tengimyndin fullklárið.  Það eru tæplega hundrað og sjötíu tengitunnur í ljósleiðarakerfinu. Tengitunna er einskonar hólkur þar sem ljósleiðarastrengir mætast og eru settir saman.  Eigendur sumarhúsa hafa ekki farið varhluta af umræðu um tengitunnur enda eru þær einmitt staðsettar þar sem heimtaugar taka við af stofnkerfinu.

Hverri og einni tengitunnu tilheyrir tengimynd þar sem skilmerkilega er skráð hvernig hinir fjölmörgu ljósleiðaraþræðir tengjast saman og mynda að lokum kerfi sem við ætlumst til að virki hjá öllum. Fyrir þá sem hafa gaman að tölfræði má geta þess að í 632 spriklandi ljósleiðaraþræðir koma sama í þeirri tengitunnu þar sem flestir ljósleiðaraþræðir mætast.   Tengitunna er á stærð við stóra kaffikönnu (svona pressukönnu eins og flestir þekkja).  Það má því lítið út af bregða í samtengingum á þráðunum.  Verktakarnir okkar sjá til þess og hafa staðið sig með stakri prýði.

Talandi um verktakana okkar. Þá vinna þeir nú hörðum höndum að því að blása strengjum og tengja notendur. Jarðvinna í verkefninu er á lokametrum og við hlökkum til að upplýsa ykkur um næstu áfanga sem verða tilbúnir til þess að panta þjónustu, vonandi á allra næstu dögum. Eins og áður hefur komið fram búum við okkur undir það að áfangi 11 verði næst tilbúinn.

Breyting á skiptingu áfanga

Glöggt áhugafólk um lagningu ljósleiðarans hefur spurst fyrir um það hvort að breyting hafi átt sér stað í áfangaskiptingu verkefnisins og vísar til upplýsinga hér á síðunni frá því 13. október sl. Slíkar fyrirspurnir gleðja okkur mjög og gott til þess að vita að verkefnið njóti aðhalds. Í flestum tilfellum byggja þær vissulega á ótta við að færast aftar í röðina „að fá tengingu“.

Þessar athugasemdir eru réttar, en þó misjafnt hvort viðkomandi hafi færst fram eða aftur. Eins og sjá má á myndinni hér fyrir neðan hefur áföngum 10, 11 og 12 verið endurraðað sé mið tekið af sambærilegri mynd frá því í október. Þessi breyting gerir kerfið enn sveigjanlegra en áður og betur undirbúið fyrir framtíðina. En um leið verðum að hryggja þá sem tilheyrðu áfanga 10 á eldri myndinni að þeir hafa færst aftar í röðina og tilheyra nú áfanga 12. Um leið getum við glatt þá sem tilheyra áfanga 11 því senn líður að því að áfangi 11 verði tilbúinn til tenginga við þjónustuveitur.

Áfangaskipting_6_6_2017Biðin fyrir íbúa í áföngum 10 og 12 verður þó ekki löng. Jarðvinnu er að mestu lokið í áfanga 12 og ef fram fer sem horfir lýkur jarðvinnu í áfanga 10 síðar í vikunni. Verið er að blása ljósleiðara í áfanga 10 og í framhaldi verður haldið í áfanga 12. Áfangi 10 og 12 klárast væntanlega samhliða.

Vinnu við áfanga 8 og 9 er að mestu lokið. Búið er að tengja inni á flestum heimilum og stofnstrengir á löngum köflum tilbúnir. Verktakar fikruðu sig frá Þykkvabæ, við blástur strengja í rör, og náðust á mynd við Rangá fyrir skömmu. Á síðari stigum verkefnis sem þessu fækkar metrum á ljósleiðarakeflum enda er afleitt að sitja uppi með mikinn aukaforða af streng í verklok þar sem Rangárljós stefnir ekki á lagningu annars slíks kerfis í langri framtíð.20170519_154205

Til þess að geta lokið við stofnlögnina frá Ægissíðu að Bjólu vantaði nokkra tugi metra af streng. Strengir sem þessir liggja ekki á lausu á þessum tíma ársins, hvorki hérlendis né erlendis. Við bárum erindið upp við strengjaframleiðanda okkar, Nestor í Finnlandi. Hann sýndi stöðunni fullan skilning og brást við með því að framleiða fyrir okkur streng í snatri og senda til okkar. Strengurinn er því væntanlegur til landsins á næstu dögum. Allur undirbúningur miðar að því að þegar strengurinn kemur til okkar getum við lokið við áfanga 8 og þar með áfanga 9 eins fljótt og kostur er.

Eins og áður upplýsum við ykkur hér á síðunni þegar tilteknir áfangar verða tilbúnir. Búast má við því að áfangi 11 verði tilbúinn næstur, þá áfangar 8 og 9 og lestina reki svo áfangar 10 og 12 nokkrum dögum eftir sumarsólstöður ef fram fer sem horfir.

Rangárljós – Opið hús núna

opidhus2Helstu þjónustuveitur hins nýja ljósleiðara í Rangárþingi ytra eru með opið hús í Miðjunni 2. hæð á Hellu núna (29/4) frá 10-12. Gott tækifæri til að gera samanburð á verði og þjónustu og þess vegna ganga frá samningi.